Mirobolanz (Livre des simples médecines, XIIIe)
[131]
758. Mirobolanz citrins sunt froiz e[t] sec (Fol. 49c) el segunt degré. C'est le fruit d'un arbre qui croist en Inde. De ceste maniere sunt tuit li autre ; mès il ont diverses formes et sunt de diverses forces ansi come prunes sunt d'un meismes lignages.
759. .v. maneires sunt de mirobolanz : citrins et kebles et emblis et indes et belleris. Li citrins, cil qui sunt gros et pesant sont li mellor, et quant l'en les depiece, qu'il sunt glumous par dedenz. L'en le[s] puet garder .x. anz. Kebles et belleris conoistroiz en tel maniere maiesmes : li kebles ne se puet garder que .v. anz ; li emblic et li inde [sunt] toz jorz buen, meis qu'il ne seiant (sic) trop vieuz.
760. Trestuit li mirobolant purgent cole, mais li uns plus el li autre mains : li citrins purge[nt] cole principalment, et après fleume ; li keble principaument fleume, et après cole ; li inde principaument melancolie, el après cole ; li emblic (Fol. 49 d) et li belleric, fleume et cole. Et, quant l'en le[s] met en medecines [compostes], l'en doit peser l'escorce tant solement ; et, quant l'en le[s] met en decoctions, si doit l'en peser o tot les noiaux, et après doit l'en metre les noiaux hors et metre l'escorce. Les autres, si come li inde et li emblis, doit l'en metre tot ensemble, quar il sunt si petit que l'en ne puet despartir le noel de l'escorce.
761. Vos devez savoir la cantité et la maneire coment vos les devez doner. Les mirobolanz citrins devez prendre en la cantité de .ij. onces et demie en tel manere : vos en feroiz poudre et metroiz en l'eve chaude, ne ne soit trop bollanz ne trop chaude, quar la force des mirobolanz se deperdroit, ensi si perdroient
[132]
la force de purgier ; nos le fretons (sic) molt bien en cele eve et donon au malade. Itel decoction puet l'en doner seürement en fievre, et vault especialment contra dissintere, et à la foiees nos la donons ovec cassiaffistles et ovec thamarindes por pugier sanc. Et quant l'en (Fol. 50 a) les done o cassiaffistles et o tamarindes, l'en doit permeiriment laver les cassiaffistles et les tamarindes et coler, et en celle coleüre metre poldre de mirobolanz et doner au matin.
762. Et devez savoir que trestotes les decoctions de mirobolanz citrins doit l'en doner au matin, et des kebles et des indes au soir. Et devez savoir que l'en doit doner la decoction ovec eve chaude à cels qui ont froit ventreil. Vos l'eschauferoiz en tel maneire : vos metroiz la coleüre, si come nos avons dit devant, en un vaissel d'argent ou de voirre, et en cel vaissel metroiz dedenz eve bollant, et einsi si l'eschafferoiz (sic). Et donroiz tote chaude, quar, se vos la donez froide, il la voucheroit tantost arreires.
763. Et devez [savoir] que, tantost com vos avroiz donee la decoctions des mirobolanz citrins, devez après doner sirop acceptous senz eve chaude, toz froiz tels come il est, o eve froide ; et s'il mainne plus que vos ne vosdroiz (sic), donez au malade à boivre molt chaude eve. Quant vos avroiz (Fol. 50 b) donee la decoction des autres mirobolanz, donez tantost au malade sirop aceptos o ove froide en esté, et en yver o eve chaude. Nos n'uson pas les autres mirobolanz einsi en si grant cantité, quar l'en ne les met nule foiee par soi ; einceis le[s] met l'en tot adès ovec les autres choses laxatives. Tels i a qui funt poudre de mirobolanz.
764. Contra la maalle des ieuz. Faites poldra de mirobolanz et metez enz. Li autre la confisent ovec eve rose et la metent secher au soleil, et ensi font .iij.
[133]
foïes ou quatre, et puis metent simplement la poldre es ieuz, ou destempree ovec eve rouse.
765. Tels [i a] qui confisent les kebles en tel maneire: il prenent les mirobolanz quant il sunt meür et coilli novellement, et les metent par .iij. jorz ou par .iiij. en tel sirop : il prennent cassiaffistle et tamarindes et magne, et destemprent en eve, et colent rnolt bien, et en cele coleüre metent çucre et font sirop, et en cel sirop metent les mirobolanz kebles ; ilueques enflent et espoissent et engroissent ; (Fol. 50 c) et les puet l'en garder .v. anz. Icist sunt rnirobolanz conduit, et valent molt à la veüe qui est troblee de la grosse fumosité de fleume et de malencolie.
766. A ceus qui se pasmunt (sic) et à ceus qui [ont] emorroïdes. Douez en un à mangier chascun matin et après donez à boivre eve chaude ovec sirop où il ait tamarindes et cassiafistles : ce lasche .ij. foiz ou .iij. sanz peril. Et ne [se] covient ja garder de viandes ; mais tant valt mieuz se garde[r] de grosses viandes.
767. Et devez savoir que mirobolanz conduit mis poise une once [ou] un petit mains.
768. En tel maneire l'afaite l'en : l'en prent les mirobolanz viez et les met l'en en leisive chaude par .v. jorz o plus, tant qu'il soient bien enflé et en grosse groisse ; après le[s] met [l'en] en tel sirop si com avons desus dit, et les i leise l'en gisir un mois o plus tant qu'il sunt bien nerzi, el les muet l'en chascun jorn. Tels i a qui i metent les noiz fresches por mieuz teindre.
769. Ce dient tels i a qu'ensi les conoistroiz : l'en prent une aguille, et, s'ele puet passier par mi les mirobolanz, il sunt (Fol. 50 d) buen ; mais c'est fauz , quar trestuit les mirobolanz, et li viez et li novieux, ont
[134]
nouiaux ansi comme prunes, et por ce ne puet pas passer l'aguille outre. Vos conoistroiz en tel maneire le buen : quan[t] l'en le depice, il est trestoz noirs par dedenz et par dehors, et, quant l'en le met en la boche, il a douce savor et en un poi pontique. Cil qui sunt afaitié ont la converse.
____________________
NB. D'autres manuscrits donnent miribolanz et cassiafides.
Le § 769 se comprend par le fait que le citrin (Phyllanthus emblica) n'a pas de noyau, alors que tous les autres (Terminalia spp.) en ont un.
